រសៀលថ្ងៃអង្គារ ១៤ កើតខែជេស្ឋ ឆ្នាំឆ្លូវ ត្រីស័ក ព.ស ២៥៦៥ ត្រូវនឹងថ្ងៃទី២៥ ខែឧសភា ឆ្នាំ២០២១ ឯកឧត្តម ជាវ តាយ អភិបាលនៃគណៈអភិបាលខេត្តកំពត បានអញ្ជើញដឹកនាំកិច្ចប្រជុំពាក់ព័ន្ធនឹងសំណើសុំចេញប័ណ្ណកម្មសិទ្ធិរបស់ប្រជាពលរដ្ឋ ១៣ គ្រួសារដែលកំពុងរស់នៅលើដីរដ្ឋ ស្ថិតក្នុងភូមិទ្វីខាងត្បូង សង្កាត់អណ្ដូងខ្មែរ ក្រុងកំពត ខេត្តកំពត ដោយមានការអញ្ជើញចូលរួមពីឯកឧត្តមអភិបាលរងខេត្ត ប្រធានមន្ទីរជំនាញពាក់ព័ន្ធ នាយខណ្ឌរដ្ឋបាលជលផល លោកនាយកទីចាត់ការអន្តរវិស័យសាលាខេត្ត លោកអភិបាលក្រុងកំពត លោកចៅសង្កាត់ពាក់ព័ន្ធ ព្រមទាំងមន្រ្តីបច្ចេកទេស សរុបចំនួន ២០ រូប។

តាមការលើកឡើងរបស់អាជ្ញាធរក្រុងកំពត និងអាជ្ញាធរសង្កាត់ ប្រជាពលរដ្ឋទាំង ១៣ គ្រួសារនេះបានតាំងលំនៅឋានរស់នៅទីនេះតាំងពីឆ្នាំ ១៩៧៩ និងខ្លះឆ្នាំ១៩៨០មកម្លេះ ដោយសាងសង់ផ្ទះនៅលើមាត់ព្រែក រហូតមកដល់ពេលបច្ចុប្បន្នពួកគាត់បានចាក់ដីរបស់ពួកគាត់ចូលក្នុងព្រែកបន្តិចម្ដងៗ នឹងធ្វើការស្នើសុំកម្មសិទ្ធិដីធ្លី ។

ក្រោយពីការចូលរួមយោបល់របស់អ្នកពាក់ព័ន្ធក្នុងកិច្ចប្រជុំរួចមក ឯកឧត្តម ជាវ តាយ អភិបាលខេត្ត បានណែនាំដល់អង្គប្រជុំ ស្នើសុំឲ្យគណៈកម្មការគ្រប់គ្រងដែនដីចុះពិនិត្យសិក្សាពិគ្រោះយោបល់ឡើងវិញនៅទីតាំងជាក់ស្ដែងនៃការស្នើសុំរបស់ប្រជាពលរដ្ឋទាំង១៣គ្រួសារនេះ ដោយផ្អែកលើលិខិតបទដ្ឋានគតិយុត្តនានាពាក់ព័ន្ធនឹងការគ្រប់គ្រងដែនដី និងចំណីព្រែក រួចយកកិច្ចការងារនេះមកដាក់ក្នុងកិច្ចប្រជុំគណៈកម្មការគ្រប់គ្រងដីរដ្ឋដើម្បីពិនិត្យ ផ្ដល់យោបល់ និងសម្រេច៕